भौत कुछ बदली गो |

भौत कुछ बदली गो 

भौत कुछ बदली गो 

दाज्यू म्यर पहाड़ में |

टीने कि छत तोड़ी बे 

इस्कूलम लेन्टर है गो ,

दस तकौक इस्कूल 

आब इंटर है गो |

ननूं कें दिक्कत नि छौ

आब इस्कूल जाण में ,

भौत कुछ बदली गो 

दाज्यू म्यर पहाड़ में |

बट घटूंक पाणि 

आब भ्यार है गो ,

दूर आब यूँ बटुक 

कच्यार है गो |

सीमेंटक बट बणे हाली  

खड़ंज उखाड़ बे ,

भौत कुछ बदली गो 

दाज्यू म्यर पहाड़ में |

बिन पियै डंगरी  

आसन में नि जान ,

दी पैग लगाई बिना 

आंग द्य्यप्त ले नि आन |

जाणी क्या - क्या बकि दिनी 

अखाण बखाण में ,

भौत कुछ बदली गो 

दाज्यू म्यर पहाड़ में |

टी. वी. देखी बिना 

टैम पासै नि हुन ,

बिन टी. वी. देखियै 

भैंस दूध ले नि दयून |

ना जुमुई, ना भीमू ,

आब पघरूंछ टी. वी. लगाण में 

भौत कुछ बदली गो 

दाज्यू म्यर पहाड़ में |

आठ बोरी ग्यौनूं जगम 

चारै हनी ,

कुछ बानर , कुछ सुंगर 

कुछ छुटी गोर खानी |

के मेहनत ले कम है गे 

और पाणि ले नि छौ गाण में 

भौत कुछ बदली गो 

दाज्यू म्यर पहाड़ में |

                                    "प्रवेश"